Versión PDF

03/02/2010

Sogama e o Concello de Ortigueira formalizan un convenio de colaboración para a xestión da planta de transferencia

Mediante este acordo será persoal do Concello o que se responsabilice da súa operación, correspondendo a Sogama os labores de mantemento e transporte de contedores de residuos urbanos ata o Complexo Medioambiental de Cerceda.

A pesar de que a obra da planta, que conta cunha inversión<A[inversión|investimento]> de 307.691 euros, culminou no 2007, atópase parada dende hai máis de dous anos. O principal motivo obedece a que o concurso licitado no seu momento para a xestión externa da mesma quedou deserto.

Con esta xa son 20 as estacións de transferencia titularidade de Sogama distribuídas por todo o territorio galego, ás que habería que engadir 5 construídas pola Consellería de Medio Ambiente e xestionadas polos propios Concellos, 1 dependente da Mancomunidade do Morrazo e 11 microplantas construídas pola Deputación de Ourense en diferentes puntos da provincia.

Ortigueira, a 3 de febreiro de 2010. - O presidente de Sogama, Luis Lamas, e o Alcalde de Ortigueira, Rafael Girón, asinaron esta mañá, na Casa Consistorial da localidade, un convenio de colaboración para a xestión da Planta de Transferencia, regulando desta forma as competencias e obrigas de ambas as dúas partes, tanto dende o punto de vista funcional coma de racionalidade do gasto público. A continuación, visitaron a infraestrutura, acompañados do persoal do Servizo municipal de Limpeza.

Tras máis de dous anos parada, a instalación, situada no Polígono Industrial de Cuiña, entrará en funcionamento durante os próximos días. A pesar de que a obra, cunha inversión<A[inversión|investimento]> de 307.691 euros, finalizou no ano 2007, unha serie de problemas administrativos bloquearon a súa posta en marcha. O principal motivo obedece a que o concurso licitado no seu momento para levar a cabo a xestión externa da planta, incluíndo tamén os servizos de mantemento e limpeza, quedou deserto. Neste sentido, Lamas agradeceu ao Alcalde ortegano que tomara a iniciativa para acabar coa parálise e dixo lamentar que "o anterior goberno non fora quen de pór en marcha a infraestrutura".

A estreita colaboración entre o ente local e Sogama permitiu superar esta dificultade, xa que, a través do acordo formalizado no día de hoxe, será persoal do ente local o que se encargue da súa operación, especialmente naquelas tarefas vinculadas á descarga dos camións procedentes da recollida municipal de residuos urbanos. Pola súa banda, esta empresa pública responsabilizarase do mantemento da propia instalación, así como do transporte dos residuos ata o Complexo  Medioambiental de Cerceda, onde o lixo é sometido a tratamento. "Suporá un esforzo económico para Sogama, pero a nosa función é prestar servizo aos Concellos", sinalou o presidente desta Sociedade.

Co fin de garantir o correcto funcionamento da planta, os traballadores do Servizo de Limpeza de Ortigueira recibirán, por parte de Sogama, a correspondente formación técnica, mentres que o Concello encargarase de instruilos nas necesarias medidas de seguridade e saúde en materia de prevención de riscos laborais. É por isto que en todo momento haberá unha estreita coordinación entre a Sociedade Galega do Medio Ambiente, o ente local e os operarios da planta co fin de evitar posibles incidencias e, de habelas, solucionalas coa maior axilidade e celeridade posible.

O rexedor de Ortigueira subliñou o considerable aforro que conlevará para as arcas municipais a entrada en funcionamento da instalación (uns 15.000 euros anuais entre combustible e mantemento dos camións que tiñan que levar o lixo ata a planta de transferencia máis próxima, a de Viveiro), e apuntou que a infraestrutura ortegana estará a disposición dos municipios limítrofes.

37 PLANTAS DE TRANSFERENCIA DISTRIBUÍDAS POLO TERRITORIO GALEGO

A instalación incorpórase así á rede de estacións de transferencia situadas en distintos puntos do territorio galego co obxectivo de solucionar esa dificultade loxística que supón a elevada dispersión da poboación galega e a centralización dos RU nun único punto común de tratamento.

Nas plantas de transferencia os RU trasvásanse a contedores de grande tamaño (40-43 m³), con capacidade para transportar 20 toneladas cada un, e dotados de todas as medidas hixiénicas e medioambientais para o seu axeitado transporte ata o Complexo Medioambiental de Cerceda, onde o lixo recibe unha xestión e tratamento conforme ás súas características e cumprindo rigorosamente coa legalidade vixente na materia.

Ao longo dos últimos anos debuxouse un mapa de infraestruturas complementarias ao núcleo central de Sogama en Cerceda configurado por un total de 37 plantas de transferencia distribuídas do seguinte xeito:

* 20 plantas titularidade de Sogama: 6 na provincia de A Coruña (Cee, Boiro, Narón, Santa Camba, Santiago de Compostela e Ortigueira); 7 na de Lugo (Lugo, Sarria, Monforte, Chantada, Barreiros, Becerreá e Viveiro); 5 na provincia de Pontevedra (Vigo, Porriño, Ribadumia, OU Roseira, Silleda); e 2 na de Ourense (San Cibrao dás Viñas e A Rúa).

* 5 plantas construídas pola Consellería de Medio Ambiente e xestionadas polos propios entes locais: A Lama e A Cañiza, na provincia de Pontevedra; Riotorto, na de Lugo; e Ponteceso e Curtis, na de A Coruña.

* 1 planta dependente da Mancomunidade do Morrazo, integrada polos Concellos de Cangas, Bueu e Moaña, na provincia de Pontevedra.

* 11 microplantas construídas pola Deputación de Ourense na provincia.

FUNCIONAMENTO DUNHA PLANTA DE TRANSFERENCIA TIPO

Con independencia das súas dimensións, o esquema de funcionamento é o mesmo en todas as plantas:

[Fase I] O camión de recollida domiciliaria accede ao recinto e, despois de ser pesado, sobe ata unha plataforma superior.

[Fase II] Unha vez situado na posición, realiza a descarga sobre unha moega.

[Fase III] Un sinxelo émbolo introduce os RU nun contedor, sen empacado, apertura de bolsas ou calquera outra manipulación.

[Fase IV] Finalizada a descarga, a instalación queda pechada esperando a chegada do seguiente camión de recollida. Unha vez cheo, o contedor transpórtase ata o Complexo Medioambiental de Sogama en Cerceda.

Saúdos, Departamento de Comunicación

Versión PDF